ბლოგი კარიერაზე

გრინვეი აკადემიის ფარგლებში სისტემატურად ტარდება ტრენინგები, რომელთა მთავარი მიზანია მომსახურების ხარისხის გაუმჯობესება, თანამშრომელთა პროფესიული უნარების გაძლიერება და მომხმარებელთა კმაყოფილების მუდმივი ზრდა. ტრენინგები სხვადასხვა მიმართულებას მოიცავს და ორიენტირებულია როგორც ტექნიკური ცოდნის გაღრმავებაზე, ისე მომხმარებელთან კომუნიკაციის გაუმჯობესებაზე.

ტრენინგს აქტიურად ესწრებოდნენ გრინვეის სტაჟიორები, გრითერები და ინსპექტორები. გრინვეი ზრუნავს მათ პროფესიულ განვითარებასა და ტექინსპექტირების შესახებ თეორიული ცოდნის გაღრმავებაზე.

სერვის პლიუსის ტრენინგები

სერვის პლიუსის მიმართულების ტრენერები ყურადღებას ამახვილებდნენ: 

თანამშრომლების კომუნიკაციის უნარების გაძლიერებაზე;

მომსახურების სტანდარტების ერთიანი და მაღალი დონის პრაქტიკაში დანერგვაზე;

მომხმარებელზე მაქსიმალურად ორიენტირებული მიდგომების განვითარებაზე ყოველდღიურ სამუშაო პროცესში.

ტრენინგების ერთ-ერთი მთავარი თემა იყო ეფექტური კომუნიკაცია. მონაწილეებმა მიიღეს როგორც თეორიული, ისე პრაქტიკული გამოცდილება.

ტრენინგის ფარგლებში მათ:

განიხილეს რეალური სამუშაო ქეისები;

იმუშავეს ყოველდღიურ სიტუაციებზე დაფუძნებულ სცენარებზე.

ტექნიკური მიმართულების ტრენინგები

ტრენინგები ჩატარდა ტექნიკური მიმართულებითაც. ტრენინგის ფარგლებში მიმოიხილეს მთავრობის N510, N511 და N37 დადგენილებით გათვალისწინებული საკითხები. მათ შორის:

ავტომობილის აგებულება;

ავტომობილის ექსტერიერისა და ინტერიერის შემოწმება;

ძრავის ნაკვეთურისა და სავალი ნაწილის თეორიული და პრაქტიკული შემოწმების მეთოდები.

ტრენერმა ასევე ისაუბრა მუხრუჭებისა და გამონაბოლქვის სავალდებულო ნორმებზე, რომლებიც აუცილებელია ავტომობილის ტექდათვალიერების წარმატებით გასავლელად. ასევე განიხილეს რეგლამენტით მითითებული ხარვეზები და ავტომობილის შემოწმების პროცესში მათი გამოვლენის მეთოდები.

თუ აღმოაჩინე ვაკანსია, რომელიც მოგწონს, პირველი ნაბიჯი შენი CV-ის გამოგზავნაა. სწორედ რეზიუმეთი ქმნი პირველ შთაბეჭდილებას დამსაქმებელზე, ამიტომ მოგიმზადეთ რამდენიმე რჩევა:

CV-ის შევსებამდე ყურადღებით წაიკითხე ვაკანსიის აღწერა და მოთხოვნები. ეს დაგეხმარება შენს რეზიუმეში ხაზი გაუსვა იმ უნარებსა და გამოცდილებას, რომლებიც კონკრეტულ პოზიციას შეესაბამება.

სწორად მომზადებული CV დიდწილად განსაზღვრავს წარმატებას მომავალ გასაუბრებაზე - ამის შესახებ დეტალურად ვსაუბრობთ ბლოგში - როგორ უნდა მოვემზადოთ გრინვეიში გასაუბრებისთვის.

როგორ მოვარგოთ CV კონკრეტულ პოზიციას

თუ გრინვეიში გრითერის ან ინსპექტორის ასისტენტის პოზიციით ხარ დაინტერესებული და ეს შენი პირველი სამსახური იქნება, არ ინერვიულო - ამ დროს ყველაზე მნიშვნელოვანი მოტივაცია და ინტერესის გამოხატვაა. 

CV-ის შედგენისას მნიშვნელოვანია გამოკვეთო უნარები, რომლებიც აღნიშნულ პოზიციაზე მუშაობისას გამოგადგება. მაგალითად, გრითერ-ოპერატორის პოზიცია კომუნიკაბელურობასა და საბუთებთან მუშაობას მოითხოვს. ამიტომ, თუ ამ ვაკანსიით ხარ დაინტერესებული, აუცილებლად გამოკვეთე კომუნიკაციის უნარი, მომსახურების სფეროსადმი ინტერესი და პასუხისმგებლობის მაღალი დონე.

მთავარია, CV-ის დაწერისას იყო გულწრფელი, არ დაამატო დეტალები, რომლებიც რეალობას არ შეესაბამება. ჩვენთვის მნიშვნელოვანია შენი რეალური ინტერესები და მოლოდინი. გულწრფელობა ყოველთვის აღიქმება დადებითად და აყალიბებს ნდობას.

გასაუბრება ყოველთვის უკავშირდება გარკვეულ სტრესს, რაც სრულიად ბუნებრივია. ახალი სამსახურის ძიებისას ყველას გვსურს პოტენციურ დამსაქმებელზე კარგი შთაბეჭდილება დავტოვოთ. თუმცა, სწორედ ამ დროს ხშირად გასაუბრებაზე მოსულებს ავიწყდებათ ყველაზე მთავარი - საკუთარი ინტერესებისა და რეალური შესაძლებლობების წარმოჩენა. მხოლოდ ამ შემთხვევაში შეძლებს დამსაქმებელი შენი უნარები და პიროვნული თვისებები რეალურად დაინახოს.

სანამ გასაუბრებაზე მიხვალ, სასურველია, კომპანიის შესახებ გარკვეულ ინფორმაციას ფლობდე. გაეცანი კომპანიის საქმიანობას, ფილიალებს და სოციალურ ქსელებში  გამოქვეყნებულ სიახლეებს.

კომპანიის საქმიანობის შესახებ მარტივად შეგიძლია მეტი გაიგო ჩვენი ბლოგებიდან, მაგალითად, ტექინსპექტირების პროცესზე ვრცლად ვწერთ სხვადასხვა  სტატიაში:  „რა და რატომ მოწმდება ტექინსპექტირებისას”, „ყველაფერი, რაც მოწმდება ტექინსპექტირებისას“ და სხვა. ასეთი ცოდნა გასაუბრებაზე დაგეხმარება, უფრო ინფორმირებული იყო კომპანიის საქმიანობის შესახებ. 

როგორ გამოვკვეთოთ მოტივაცია და ინტერესები

თუ გრინვეიში ინსპექტორის ან ინსპექტორის ასისტენტის პოზიციით ხარ დაინტერესებული, აუცილებლად გამოკვეთე შენი მოტივაცია. ისაუბრე, რატომ მოგწონს ავტოსფერო და რა განაპირობებს შენს ინტერესს ტექნიკური ინსპექტირების მიმართ. 

გრითერ-ოპერატორის პოზიციაზე მთავარი ფაქტორი მომსახურებისადმი სიყვარულია. აჩვენე, რომ მოგწონს ადამიანებთან ურთიერთობა და გინდა განივითარო უნარები, რომლებიც დაგეხმარება კარიერულ ზრდაში. ასეთი გულწრფელი დამოკიდებულება ბევრად უფრო დამაჯერებელია, ვიდრე სტანდარტული ფრაზები.

ბუნებრივად ისაუბრე შენს წარმატებებსა და სირთულეებზე - სწორედ ეს ქმნის შენს პიროვნებას. გააზიარე შენი გამოცდილება, ისაუბრე მიზნებზე და რაც მთავარია, დასვი კითხვები, ასე HR უკეთ გაგიცნობს და დაინახავს შენს ინტერესს.